galego | español
texto pequeño
buscar

Noticias

Documentación e Patrimonio

xoves, 10 de maio de 2012
"Programación municipal para conmemorar o Día das Letras Galegas"
foto

O Concello de Grove conmemorará o Día das Letras Galegas cunha programación de actividades que se está a desenvolver desde principios de maio e se prolongará ata o venres 18. Esta programación inclúe exposicións e a presentación dun libro, bibliotroco, contacontos, feira do libro e actuacións de danza e música, entre outras propostas. O seu obxectivo, segundo explica o concelleiro de Novas Tecnoloxías, Documentación e Patrimonio, Alexandre Aguín, “é ofrecerlle ao cidadán un amplo abanico de actividades coas que festexar e conmemorar o Día das Letras Galegas e, de paso, fomentar o hábito da lectura en galego. É importante apostar por defender o uso do noso idioma e da nosa identidade”. En total, a programación inclúe ata dez actividades e propostas para todas as idades, que se levarán a cabo na biblioteca municipal e na praza do Corgo.

Acompañando as actividades da programación das Letras Galegas, repartirase entre todos os participantes o “lapis máxico que só escribe en galego”. Trátase dunha iniciativa que pretende concienciar e sensibilizar sobre a importancia de manter e defender o idioma galego, tanto na fala como na escrita, facéndolle comprender á cidadanía que está nas súas mans facelo.

 

Bibliotroco e exposición

A programación das Letras Galegas xa deu comezo con “Bibliotroco, compartindo lecturas” e coa exposición sobre o homenaxeado este ano polas Letras Galegas, Valentín Paz-Andrade “Colleita do 1898”. O bibliotroco, ou mesa de intercambio de libros, organízase na Rede de Bibliotecas do Grove ata o día 18. Busca fomentar a cultura, o hábito lector e, asemade, dotar aos libros dunha segunda oportunidade. O procedemento é moi sinxelo. As persoas interesadas deben achegarse á biblioteca municipal do Grove, revisar os libros expostos na mesa de intercambio e coller os exemplares que máis lles gusten. Así mesmo, poderán deixar outros libros que xa leron. Os primeiros exemplares xa foron cedidos pola propia Rede de Bibliotecas.

Tamén, ata o día 18, na biblioteca do Grove se pode visitar a exposición sobre Valentín Paz-Andrade. É unha colección de dez carteis que conforman a exposición "Colleita do 1898", acompañada dunha guía didáctica explicativa, para fomentar o achegamento do público a este autor e á súa obra.

 

Presentación de Daniel Ameixeiro

Pola súa banda, mañá venres o escritor Daniel Ameixeiro presenta na Casa da Cultura do Grove o libro A Torre das Lavercas. Organizado pola Edicións Xerais e coa colaboración do Concello do Grove, o acto comezará ás 20.00 horas. Daniel Ameixeiro (O Grove, 1962) é enxeñeiro de Telecomunicacións e desde 1982 reside en Madrid, cidade onde traballa. Ten publicado: Bonifacio foi a palacio (1999), Xan e Pericán (Xerais 2004), finalista do Premio Merlín 2003 e A Torre das Lavercas (Xerais 2012).

 

Contacontos

Para os máis pequenos da casa a programación das Letras Galegas inclúe contacontos os días 16 e 17 de maio. O martes é a quenda de “Carola, a carteira centola”, a cargo de Mau e Pin. Ás 17.30 horas, na biblioteca pública municipal do Grove, Mau e Pin, autores da colección "Polo correo do vento" (Xerais), propoñen unha actividade de exposición oral co coñecemento da cultura do mar e de respecto do medio, todo isto vencellado a unha ilustración plástica. Esta actividade completarase coa realización por cada neno/a dun debuxo guiado polo ilustrador.

Xa o día 17, á mesma hora, pero nesta ocasión na praza do Corgo, estará o contacontos “Dada, o Duende”. Co obxectivo de fomentar o hábito lector entre os nenos e as nenas, estes gozarán dunha divertida sesión chea de contos que lles irá relatando un trasno chamado "Dada". Esta sesión de contacontos fará as delicias do público infantil grazas a divertidos e amenos contos adaptados á súa idade.

 

Día das Letras Galegas

As actividades do xoves 17 de maio, na praza do Corgo, desenvolveranse desde as 17.00 horas. Comezará coa Feira do Libro, a cargo da Asociación de Libreiros do Grove en colaboración co Concello do Grove. A Concellería de Documentación contará tamén cunha mesa informativa, onde se explicarán os diferentes servizos cos que conta, a forma que ten a cidadanía de poder acceder a eles, os horarios... e darase resposta ás preguntas e dúbidas que poidan ter sobre os servizos ou o seu funcionamento. Outra das presenzas importantes da xornada serán as dos artistas locais Gogue e Juan Sendino, que asinarán libros para os asistentes.

 

Para os nenos, ademais do contacontos, tamén haberá dous grandes inchables, mentres que a partir das 19.00 horas comezará a actuación da Asociación Cantodorxo. Os diferentes grupos de baile desta asociación interpretarán unha completa e variada mostra de baile galego co fin de entreter e deleitar o público asistente. Xa ás 20.30 h, a música correrá a cargo do cuarteto Carapaus, que ofrecerá un concerto folk do máis enxebre e festeiro para que o público asistente teña un moi bo final de festa.

 
Galería:
 

axenda

calendario
mes anterior decembro | 18 mes próximo
LMMXVSD
12
3456789
10111213141516
17181920212223
24252627282930
31

noticias

perfil do
contratante

portal de
turismo

boletín ADL

Apúntate ao noso boletín

boletín OMIX

Apúntate ao noso boletín

avisos sms

síguenos en
logotipo consellería innovación e industria logotipo Ministerio Industria, turismo y comercio logotipo FEDER

2009. Concello do Grove, Praza do Corgo nº 1 | T. 986 73 09 75 | F. 986 73 13 58
aviso legal | créditos | rss
páxina accesible AA rss