O Concello do Grove ten lista a súa programación para conmemorar o Día da Biblioteca o 24 de outubro.

As actividades desenvolveranse ao longo de todo o mes de outubro e as prazas son limitadas, polo que é necesario inscribirse nas bibliotecas, no tfno. 986 732 341, no correo electrónico biblioteca@concellodogrove.es ou nas redes sociais.

O venres 8 de outubro comezará o programa “Enredando coa biblioteca”, unha proposta de actividades de dinamización lectora dirixidas a público infantil que se desenvolverán os días 8, 15, 20 e 29 de outubro a partir das 18.00 h na Biblioteca Municipal do Grove.

O 8 de outubro terá lugar o obradoiro creativo “Un ovo egg-pecial”, dirixido á rapazada de máis de 6 anos; o 15 de outubro organizarase unha pescuda do tesouro, “O misterio da bibliotecaria”, dirixido á rapazada maior de 7 anos. O 20 de outubro proxectarase a película de cinema infantil “Mr. Magorium e a súa tenda máxica” e o venres 29 de outubro ofrecerase un novo obradoiro creativo para a rapazada de máis de 8 anos, “Pulp fiction”.

O venres 22 de outubro a partir das 18.00 h, na Biblioteca Municipal do Grove, dentro do programa “Tornar ás táboas” financiado pola Deputación de Pontevedra, terá lugar o espectáculo “Cinema e historias da man de Alice Guy”, a cargo de Raquel Queizás. Este espectáculo, dirixido á rapazada a partir de 5 anos, mestura a narración co teatro e o cinema, pretende divertir e espertar nas nenas e nos nenos o amor polo cine, descubrirlles o poder que teñen as imaxes e o cinema para transmitir historias.

O luns 25 ofrecerase na Axencia de Lectura de San Vicente o espectáculo de narración oral “Un libro baixo a almofada”, a cargo de Caxoto Contacontos.

As actividades complétanse coa exposición “Clásicos da literatura infantil e xuvenil” e outras sorpresas.